OpenAI-ը ներկայացրել է ChatGPT Atlas, նոր արհեստական բանականությամբ աշխատող վեբ բրաուզերը, որը դարձնում է ինտերնետում որոնումը ավելի անձնական և ինտերակտիվ։ Atlas-ը ստեղծվել է ChatGPT-ի հիման վրա և թույլ է տալիս օգտատերերին ուղղակիորեն խոսել բրաուզերի հետ՝ հեշտությամբ կատարելով տարբեր առօրյա գործողություններ։
Բրաուզեր, որի հետ կարելի է խոսել
ChatGPT Atlas-ը թույլ է տալիս շփվել բրաուզերի հետ ձայնային կամ գրավոր եղանակով։ Այն կարող է օգնել տարբեր առօրյա գործողություններում, օրինակ՝ պատվիրել ուտելիք, խմբագրել փաստաթղթեր, գտնել ավիատոմսեր կամ ստուգել էլ․ փոստը։
ChatGPT-ն՝ յուրաքանչյուր էջում
Atlas-ի յուրաքանչյուր էջում կա ChatGPT-ի կողային պատուհան, որը միշտ հասանելի է։ Օգտատերը կարող է դրանից օգտվել՝ հոդվածը կարճ ամփոփելու, ապրանքները համեմատելու կամ տվյալները վերլուծելու համար։ Այն նաև կարող է խմբագրել ընտրված տեքստը։ Օրինակ՝ կարելի է նշել էլ․ նամակի մի հատված և խնդրել ChatGPT-ին գրել այն ավելի պաշտոնական ձևով։
Ավելի խելացի և հարմարավետ օգտագործում
Atlas-ը հիշում է ձեր որոնումների բովանդակությունը, որպեսզի հաջորդ անգամ ավելի արագ և օգտակար առաջարկներ անի։ Այսպիսով բրաուզերը «սովորում է» ձեր նախասիրությունները՝ դարձնելով աշխատանքը ավելի հեշտ։ Միաժամանակ դուք լիովին վերահսկում եք ձեր տվյալները։ Կարող եք որոշել՝ ինչ տեղեկություն թողնի Atlas-ը հիշողության մեջ, ինչպես օգտագործվեն ձեր տվյալները, և երբ մաքրվեն դրանք։
Նախնական կարգավորմամբ բրաուզերի տվյալները չեն օգտագործվում ChatGPT-ի մոդելների ուսուցման համար։ Դուք կարող եք ցանկացած պահի ջնջել ձեր որոնումների պատմությունը։ Իսկ եթե միացնեք Browser Memories գործառույթը, ChatGPT-ն կպահի միայն ընդհանուր փաստեր ու օգտակար նշումներ ձեր որոնումներից՝ առանց կոնկրետ բովանդակությունը պահպանելու։
Առկա հարթակներ
Այս պահին բրաուզերը հասանելի է միայն macOS համակարգում, բայց շուտով այն հասանելի կլինի նաև Windows, iOS և Android սարքերում։.
Մրցակցությունը AI բրաուզերների շուկայում
OpenAI-ը մուտք է գործում արագ աճող մի շուկա, որտեղ արդեն կան արհեստական բանականությամբ աշխատող բրաուզերներ։ Օրինակ՝ Google-ը իր Chrome բրաուզերում արդեն ավելացրել է Gemini AI-ի հնարավորությունները, իսկ Perplexity AI-ը ստեղծել է սեփական խելացի բրաուզերը։ Atlas-ի ներկայացումից հետո Google-ի բաժնետոմսերը նվազել են 4 տոկոսով, ինչը ցույց է տալիս, որ ներդրողները Atlas-ը համարում են Chrome-ին լուրջ մրցակից։
Որոնման ապագան
ChatGPT Atlas-ը նոր մակարդակի բրաուզեր է, որը դարձնում է համացանցը ավելի խելացի և անհատական։ Այն միավորում է առաջատար չաթբոտը և առօրյա վեբ գործառույթները, այնպես, որ բրաուզերը աշխատում է որպես օգտակար թվային օգնական, ոչ թե միայն սովորական որոնման գործիք։
